Özbəkistan dövlət orqanları 43 növ ictimai məlumatı açıqlamalıdır

Özbəkistanda dövlət orqanları və təşkilatları 43 növ ictimai əhəmiyyətli məlumatı Açıq Məlumatlar Portalında və rəsmi internet saytlarında yerləşdirməlidir. Həmin məlumatların siyahısı qanunvericilikdə dərc olunub. Xəbəri UzDaily Daşkənddən yayıb.

Siyahıya rəsmilərin ezamiyyət və xarici qonaqların qəbulu xərcləri, xidməti nəqliyyatın, mənzil və digər daşınmaz əmlakın istifadəsi, satınalma komissiyalarının tərkibi və dövlət satınalmaları, vakansiyalar, işə qəbul şərtləri və namizədlərə tələblər daxildir. Həmçinin hac növbəsi regionlar üzrə, dövlət universitetlərinin gəlir və xərcləri, yerli büdcə vəsaitlərinin istifadəsi və dövlət məktəbəqədər təhsil müəssisələrinə uşaqların qəbulu üzrə ərizələrin sırası açıqlanmalıdır. Bu məlumatların vaxtında və keyfiyyətlə yerləşdirilməsinə ictimaiyyətlə əlaqələr və vətəndaş müraciətləri ilə işləyən bölmələr cavabdehdir.

Korrupsiyaya qarşı mübarizə agentliyi dövlət orqanlarının açıqlığını təmin etmək üzrə işi koordinasiya etdiyini və tələblərə riayəti daimi əsasda izlədiyini bildirib. Korrupsiya faktları barədə vətəndaşlar 1253 nömrəli telefon vasitəsilə məlumat verə bilərlər.