Өзбекстанда ауыз су тарифтері: Ташкентте 1 400, Сурхандарьада 6 800 сум

Өзбекстан астанасы Ташкентте орталықтандырылған су жүйесі арқылы халыққа жеткізілетін ауыз судың бір литрі 1 сум 40 тийин тұрады. Бұл туралы 30 қазанда баспасөз конференциясында «Узсувтаъминот» АҚ өкілдері мәлімдеді. Өзбекстан бойынша халық үшін ауыз су тарифі текше метріне орта есеппен 4 217 сум, яғни бір литрі шамамен 4 сум 22 тийин.

Шараға қатысушылар ең төмен тарифтің Ташкентте текше метріне 1 400 сум екенін, оның 2023 жылғы 15 желтоқсаннан бері өзгермегенін, ал ең жоғары тарифтің Сурхандарья облысында 6 800 сум екенін айтты. Компания өңірлер арасындағы айырмашылықты табиғи-географиялық жағдайға, су көздерінің қолжетімділігіне, сондай-ақ тасымалдау мен тазарту шығындарына байланыстырды. Тау етегіндегі аудандарда су көздері жақын әрі сапалы болғандықтан шығын аз, ал құрғақ аудандарда су басқа өңірлерден құбырлар арқылы жеткізіледі.

Сонымен қатар халықтың ауыз су мен кәріз қызметтері бойынша қарызы Өзбекстан бойынша 430,7 млрд сумға жеткені, ең үлкен қарыз 92,9 млрд сум болып Ташкентте тіркелгені хабарланды. Заңнамаға сәйкес, бұл қызметтер үшін төлем әр айдың 10-ына дейін толық көлемде алдын ала төленуі тиіс.