Өзбекстанда ичүүчү суунун тарифтери: Ташкентте 1 400, Сурхандарьяда 6 800 сум

Өзбекстандын борбору Ташкентте борборлоштурулган суу түтүгү тутуму аркылуу калкка жеткирилген ичүүчү суунун бир литри 1 сум 40 тыйын турат. Бул жөнүндө 30-октябрда басма сөз жыйынында «Узсувтаъминот» АКнын өкүлдөрү билдирди. Өзбекстан боюнча калк үчүн ичүүчү суунун орточо тарифи бир кубометр үчүн 4 217 сум, бул бир литр үчүн болжол менен 4 сум 22 тыйын дегенди билдирет.

Жыйында эң төмөнкү тариф Ташкентте бир кубометр үчүн 1 400 сум экени, ал 2023-жылдын 15-декабрынан бери өзгөрүүсүз калганы жана эң жогорку тариф Сурхандарыя облусунда 6 800 сум экени айтылды. Компания аймактар ортосундагы айырманы табигый-географиялык шарттарга, суу булактарынын жеткиликтүүлүгүнө, ошондой эле ташуу жана тазалоо чыгымдарына байланыштырды. Тоо этегиндеги райондордо булактар жакын жана сапаттуу болгондуктан чыгым арзан, ал эми кургак райондордо суу башка аймактардан түтүктөр аркылуу жеткирилет.

Анын үстүнө калктын ичүүчү суу жана канализация кызматтары боюнча карызы Өзбекстан боюнча 430,7 млрд сумга жеткени, эң чоң карыз 92,9 млрд сум менен Ташкентте катталганы билдирилди. Мыйзамга ылайык, бул кызматтардын акысы ар айдын 10-санына чейин толук көлөмдө алдын ала төлөнүшү керек.