Özbəkistanda içməli su tarifləri: Daşkənddə 1 400, Surxandəryada 6 800 sum

Özbəkistanın paytaxtı Daşkənddə mərkəzləşdirilmiş su təchizatı sistemi vasitəsilə əhaliyə verilən içməli suyun bir litrinin qiyməti 1 sum 40 tiyindir. Bu barədə 30 oktyabrda keçirilən mətbuat konfransında «Uzsuvtaminot» ASC-nin nümayəndələri məlumat veriblər. Ölkə üzrə əhali üçün içməli su tarifi orta hesabla kubmetr başına 4 217 sum təşkil edir ki, bu da bir litr üçün təxminən 4 sum 22 tiyin deməkdir.

Tədbirdə ən aşağı tarifin Daşkənddə kubmetr başına 1 400 sum olduğu, 2023-cü il 15 dekabrdan dəyişmədiyi, ən yüksək tarifin isə Surxandərya vilayətində 6 800 sum olduğu bildirilib. Şirkət regionlar arasındakı fərqi təbii və coğrafi şəraitə, su mənbələrinin əlçatanlığına, habelə daşınma və təmizləmə xərclərinə bağlayıb. Dağlıq rayonlarda mənbələr yaxın və keyfiyyətli olduğu üçün xərclər aşağıdır, quraq rayonlarda isə su digər regionlardan boru xətləri ilə daşınır.

Bundan əlavə, əhalinin içməli su və kanalizasiya xidmətləri üzrə borcunun ölkə üzrə 430,7 milyard sum təşkil etdiyi, ən böyük borcun 92,9 milyard sum ilə Daşkənddə olduğu qeyd edilib. Qanunvericiliyə görə, bu xidmətlərin haqqı hər ayın 10-na qədər tam məbləğdə avans ödənilməlidir.