Oʻzbekistonda ichimlik suv tariflari: Toshkentda 1 400, Surxondaryoda 6 800 soʻm

Oʻzbekiston poytaxti Toshkentda markazlashgan suv taʼminoti tizimi orqali aholiga yetkazib beriladigan ichimlik suvining bir litri 1 soʻm 40 tiyin turadi. Bu haqda 30 oktyabr kuni matbuot anjumanida «Uzsuvtaminot» AJ vakillari maʼlum qilishdi. Respublika boʻyicha aholi uchun ichimlik suvi tarifi kubometriga oʻrtacha 4 217 soʻm boʻlib, bu bir litr uchun taxminan 4 soʻm 22 tiyinga teng.

Tadbirda eng past tarif Toshkentda kubometriga 1 400 soʻm ekani, u 2023-yil 15-dekabrdan beri oʻzgarmagani hamda eng yuqori tarif Surxondaryo viloyatida 6 800 soʻm ekani aytildi. Kompaniya hududlar oʻrtasidagi farqni tabiiy-geografik sharoit, suv manbalarining mavjudligi hamda uni tashish va tozalash xarajatlari bilan izohladi. Togʻoldi tumanlarida manbalar yaqin va sifatli boʻlgani uchun xarajat arzon, quruq hududlarda esa suv boshqa hududlardan quvurlar orqali keltiriladi.

Shuningdek, aholining ichimlik suvi va kanalizatsiya xizmatlari boʻyicha qarzi respublika miqyosida 430,7 milliard soʻmga yetgani, eng katta qarz 92,9 milliard soʻm bilan Toshkentda qayd etilgani maʼlum qilindi. Qonunchilikka koʻra, bu xizmatlar uchun toʻlov har oyning 10-sanasigacha toʻliq miqdorda oldindan amalga oshirilishi kerak.