Oʻzbekistonning JSTga aʼzo boʻlish jarayonidagi islohotlar yuqori baholandi

JST ishchi guruhi raisi S. Choy hamda JST kotibiyati aʼzolik boʻlimi direktori M. Oshikava boshchiligidagi delegatsiya Oʻzbekiston Respublikasi Adliya vazirligiga tashrif buyurdi. Adliya vazirining birinchi oʻrinbosari M. Istamov bilan uchrashuvda milliy qonunchilikni JST bitimlariga uygʻunlashtirish, erishilgan natijalar va hamkorlikning istiqboldagi yoʻnalishlari muhokama qilindi.

M. Istamov JSTga aʼzo boʻlishni mamlakatdagi iqtisodiy islohotlarning ustuvor yoʻnalishlaridan biri deb taʼkidladi. 2023 yildan buyon 200 dan ortiq normativ-huquqiy hujjat JST bitimlari talablariga muvofiqlashtirildi. Xorijiy investitsiyalar ishtirokidagi va mahalliy korxonalarni davlat roʻyxatidan oʻtkazish uchun belgilangan davlat boji hamda rezident va norezidentlar uchun patent boji birxillashtirildi.

S. Choy amalga oshirilayotgan keng koʻlamli islohotlarni yuqori baholab, milliy qonunchilikni xalqaro savdo qoidalariga uygʻunlashtirish boʻyicha izchil saʼy-harakatlarni eʼtirof etdi. Tomonlar JSTga aʼzo boʻlish jarayonini muvaffaqiyatli yakunlash hamda tadbirkorlar va investorlar uchun shaffof, barqaror va oldindan aniq huquqiy muhit shakllantirish yoʻlida muloqot va amaliy hamkorlikni davom ettirish muhimligini taʼkidladilar.