Oʻzbekiston JSTga 2027-yilda aʼzo boʻlishni maqsad qilgan, muzokaralar davom etmoqda

Oʻzbekistonning Jahon savdo tashkilotiga (JST) aʼzo boʻlishi uchun 2026-yilda muzokaralarni toʻliq yakunlash va 2027-yilda aʼzo boʻlish kutilmoqda. Bu haqda JSTga aʼzolik jarayoni boʻyicha ishchi guruh raisi Sung Yo Choi 3-noyabr kuni Toshkent shahrida oʻtgan matbuot anjumanida maʼlum qildi.

Ishchi guruh ikkita yigʻilish oʻtkazgani, aʼzo davlatlarning 400 dan ortiq savollariga javob berilgani va 30 dan ziyod hujjat taqdim etilgani aytildi. Oʻzbekiston tovar va xizmatlar bozorlariga kirish boʻyicha aʼzo davlatlar bilan 30 dan ortiq kelishuvga erishgan. Prezident administratsiyasi masʼul xodimi Iskandarbek Genjayev esa yirik davlat korxonalarining eksklyuziv huquqlari bekor qilinganini va shaffof eksport boji mexanizmi joriy etilganini aytdi.

Sung Yo Choi muzokaralar oson kechmayotganini, har bir aʼzo davlatning oʻz manfaatlari borligini taʼkidladi. Oʻzbekiston jarayonni 1994-yilda boshlagan, ammo oʻtgan 32 yil davomida u bir necha bor toʻxtab qolgan.