Oʻzbekiston Markaziy banki stavkani 14% da saqladi, inflyatsiya prognozini 7% ga oshirdi

Oʻzbekiston Markaziy banki boshqaruvi 4-noyabr kuni asosiy stavkani yillik 14% darajasida saqlab qoldi. Bank 2026 yil oxiriga moʻljallangan inflyatsiya prognozini 6,5% dan 7% gacha oshirdi. Bank bu oʻzgarishni issiqlik va issiq suv tariflarining oshishi hamda propanning keskin qimmatlashuvi bilan izohladi.

Markaziy bank raisi oʻrinbosari Nodirbek Achilov matbuot anjumanida tarif oʻzgarishlari bilan bir vaqtda yumshatuvchi choralar ham belgilanganini aytdi. Gazlashtirilmagan hududlarda elektr energiyasining asosiy isteʼmol meʼyori 200 kVt·soatdan 350 kVt·soatgacha oshirildi, Yagona ijtimoiy himoya reestriga kiritilgan oilalarga esa bir martalik kompensatsiya beriladi. Achilovning soʻzlariga koʻra, aholi uchun suyultirilgan gaz narxi 2,5 barobar oshgan va bu taʼsir joriy prognozda hisobga olingan.

Pul-kredit siyosati departamenti rahbari Samigjon Inogʻamov issiqlik va issiq suv tariflari dastlabki prognozlarga kiritilganini, biroq eʼlon qilingan tariflar kutilganidan biroz yuqori boʻlganini taʼkidladi. Spot xabar berganidek, Markaziy bank asosiy stavkani 13,5% gacha pasaytirish imkoniyatini ham koʻrib chiqqan edi. Inogʻamov bu omil qatʼiy pul-kredit shart-sharoitlarini saqlash va stavkani 14% darajasida belgilash qarorida asosiy oʻrin tutganini aytdi.