Oʻzbekiston: ehtiyojmand ayollarga 22 million soʻmgacha ijtimoiy yordam

Mamlakatda ehtiyojmand ayollarga «Ayollar daftari» jamgʻarmasi orqali 22 million soʻmgacha ijtimoiy yordam koʻrsatiladi. Yordam, ayniqsa, ogʻir turmush sharoitiga tushib qolgan ayollarning uy-joylarini taʼmirlashi uchun moʻljallangan. Bu miqdor BHMning 50 baravariga teng. Davlat rahbarining 2026-yil 11-sentyabrdagi farmoni bu boradagi islohotlarni yangi bosqichga olib chiqdi.

Farmon bilan yordam koʻlami kengaytirildi, sogʻliqni tiklash va uy-joy sharoitlarini yaxshilash bilan bogʻliq koʻplab byurokratik toʻsiqlar olib tashlandi hamda mablagʻ ajratish tartiblari soddalashtirildi. Ijtimoiy reestrga kiritilgan va har bir aʼzosiga toʻgʻri keladigan oʻrtacha oylik daromadi minimal isteʼmol xarajatlari miqdorining ikki baravaridan oshmaydigan oilalar yordam olishi mumkin. Masalan, 5 kishilik oilaning oylik jami daromadi 7 million soʻm boʻlib, har bir kishiga 1,4 million soʻmdan toʻgʻri keladi. Bu 1 million 430 ming soʻmlik mezondan past.

Uy-joyni taʼmirlashga haqiqiy ehtiyoj «mahalla yettiligi» tomonidan joyida oʻrganiladi. Tuman (shahar) shtablari ijtimoiy reestrga kiritilmagan, ammo kambagʻallik xavfi mavjud boshqa ehtiyojmand oilalarga ham yordam berish toʻgʻrisida qaror qabul qilishi mumkin. Murojaat uchun yashash joyidagi mahalla xotin-qizlar faoliga ariza topshiriladi. Maʼlumotlar Toshkent davlat yuridik universiteti Yuridik klinikasi xodimi Imomali Tuevning fikrlariga asoslangan.