Aliyev va Toqayev Kaspiy dengizining ikki qirgʻogʻini birlashtirdi

15-oktabr kuni Ozarbayjon Prezidenti Ilhom Aliyev va Qozogʻiston Prezidenti Qosim-Jomart Toqayev uchrashdi. Suhbatda Ozarbayjon va Qozogʻiston oʻrtasidagi strategik sheriklik hamda ittifoqchilik munosabatlarining muvaffaqiyatli rivojlanishidan mamnunlik bildirildi. Davlat rahbarlarining oʻzaro tashriflari ikki tomonlama hamkorlikni kengaytirishga muhim hissa qoʻshgani qayd etildi.

Rahbarlar Bakuda oʻtkazilayotgan Osiyoda oʻzaro hamkorlik va ishonchni mustahkamlash choralari boʻyicha konferensiyaning (CICA) 7-sammiti yuqori darajada tashkil etilganini taʼkidladi. Shundan soʻng ikki rahbar onlayn formatda Transkaspiy optik tolali kabel liniyasining ochilish marosimini oʻtkazdi.

Loyiha «Raqamli Ipak yoʻli» tashabbusi doirasida amalga oshirilgan boʻlib, Sumgayit va Oqtau oʻrtasida Kaspiy dengizi tubiga yotqizilgan taxminan 380 kilometr uzunlikdagi kabel liniyasini oʻz ichiga oladi. Soniyasiga 400 terabitdan ortiq oʻtkazish qobiliyatiga ega liniya Xitoy va Markaziy Osiyodan maʼlumotlarni Ozarbayjon, Qozogʻiston va Gruziya orqali Yevropaga uzatadi. Toqayev loyihani yangi turdagi koridor deb atadi, Aliyev esa liniya Markaziy Osiyo bilan Janubiy Kavkaz oʻrtasidagi hamkorlikni mustahkamlashini aytdi.