Əliyev və Tokayev Xəzərin iki sahilini birləşdirdi

15 oktyabrda Azərbaycan Prezidenti İlham Əliyev ilə Qazaxıstan Prezidenti Qasım-Comart Tokayev görüşdü. Görüşdə iki ölkə arasında strateji tərəfdaşlıq və müttəfiqlik münasibətlərinin uğurlu inkişafından məmnunluq ifadə edildi. Ölkə başçılarının qarşılıqlı səfərlərinin ikitərəfli əməkdaşlığın genişlənməsinə mühüm töhfə verdiyi qeyd olundu.

Liderlər Bakıda keçirilən Asiyada Qarşılıqlı Əlaqə və Etimad Tədbirləri Konfransının (CICA) 7-ci Sammitinin yüksək səviyyədə təşkil olunduğunu vurğuladılar. Daha sonra iki lider onlayn formatda Transxəzər fiber-optik kabel xəttinin açılış mərasimini keçirdi.

Rəqəmsal İpək Yolu təşəbbüsü çərçivəsində həyata keçirilən layihə Sumqayıt ilə Aktau arasında Xəzər dənizinin dibinə çəkilmiş təxminən 380 kilometr uzunluğunda kabel xəttini əhatə edir. Saniyədə 400 terabitdən çox ötürmə qabiliyyətinə malik xətt Çin və Mərkəzi Asiyadan Avropaya məlumatları Azərbaycan, Qazaxıstan və Gürcüstan üzərindən ötürəcək. Tokayev layihəni yeni tipli dəhliz adlandırdı, Əliyev isə xəttin Mərkəzi Asiya ilə Cənubi Qafqaz arasında əməkdaşlığı gücləndirəcəyini bildirdi.