Oʻzbekistonda kutilayotgan inflyatsiya kuzatuv davridagi eng past darajaga tushdi

Oʻzbekistonda aholining kutilayotgan inflyatsiya darajasi sentabr oyida keskin pasayib, kuzatuv davridagi eng past koʻrsatkichga tushdi. Markaziy bank xabariga koʻra, oʻrtacha inflyatsiya prognozi avgustga nisbatan 1,1 foiz bandga kamayib 8,7% ni tashkil etdi. Mediana koʻrsatkichi avgustdagidek 8% da qoldi.

Hududlar orasida eng yuqori inflyatsiya kutilmasi yana 11,6% bilan Toshkentda qayd etildi; undan keyin Sirdaryo (9,7%) va Fargʻona (9,5%) viloyatlari keldi. Pensionerlar 12,4% bilan eng yuqori prognoz bergan guruh boʻldi. Soʻrovda ishtirok etganlarning 50% i yoqilgʻi va energiya resurslari qimmatlashuvini eng koʻp qayd etdi.

Biznes muhitidagi kutilmalar esa sekinroq pasaymoqda. Keyingi bir yil uchun oʻrtacha narx oshishi prognozi 9,2% (-0,4 foiz band) ni tashkil etdi, mediana esa iyuldagi 9% darajasiga qaytdi. Logistika sohasi 10,7% bilan eng yuqori, turizm sohasi 7,5% bilan eng past kutilmani bildirdi.