Oʻzbekiston Markaziy banki: ayrim tovarlar narxi arzonlashmoqda, inflyatsiya sekinlashmoqda

4-noyabr kuni Oʻzbekiston Markaziy banki raisining oʻrinbosari Nodirbek Achilov isteʼmol savatiga kiruvchi aksariyat tovar va xizmatlar narxi oʻsish surʼatining sekinlashayotganini maʼlum qildi. 2027–2029-yillarga moʻljallangan pul-kredit siyosati va asosiy stavka boʻyicha matbuot anjumanida jurnalist savoliga javob berib, narxlar oshgandan keyin deyarli hech qachon pasaymaydi degan fikrga qoʻshilmasligini aytdi. Savatdagi 517 ta pozitsiyadan narx oʻsishi tezlashgan pozitsiyalar ulushi 2025-yil iyun oyida taxminan 45 foiz boʻlgan boʻlsa, hozir 22–25 foizgacha qisqargan.

Achilov oʻsimlik yogʻi narxi pandemiyadan keyin litriga 30–35 ming soʻmgacha chiqqanini, hozir esa 18–19 ming va 22 ming soʻmlik yogʻlar mavjudligini misol qilib keltirdi. Bunday oʻzgarishlarni iqtisodiyotning ochiqligi va raqobat rivoji bilan bogʻladi, jumladan, yangi agregatorlar paydo boʻlgani yirik ishtirokchilarni tariflarni qayta koʻrib chiqishga majburlagani haqida gapirdi. Oziq-ovqat mahsulotlari boʻyicha vaziyat murakkabroq: ayrim toifalarda narx oʻsishi 8–10 foizga yetmoqda, goʻsht taklifini oshirish esa koʻproq vaqt talab qiladi.

Markaziy bank maʼlumotlariga koʻra, 2026-yil sentyabrida yillik inflyatsiya 6,4 foizni tashkil etgan; avgustda 6,2 foiz, oʻtgan yilning sentyabrida esa 8 foiz boʻlgan. Bank kuchli ichki talab va inflyatsion xavflarni sabab qilib, asosiy stavkani yillik 14 foiz darajasida saqlab qoldi hamda inflyatsiyaning 2027-yil ikkinchi yarmida 5 foizlik maqsadli koʻrsatkichga yaqinlashishini kutmoqda.