Konstitutsiyaviy sud toʻgʻrisidagi konstitutsiyaviy qonun imzolandi

Davlatimiz rahbari “Oʻzbekiston Respublikasining Konstitutsiyaviy sudi toʻgʻrisida”gi konstitutsiyaviy qonunni imzoladi. Qonunga koʻra, Konstitutsiyaviy sud qonunlar, Oliy Majlis palatalari qarorlari, Prezident farmon va qarorlari, Hukumat hamda mahalliy davlat hokimiyati organlari qarorlarining Konstitutsiyaga muvofiqligini aniqlaydi. Sud, shuningdek, Qoraqalpogʻiston Respublikasi qonunlarining Oʻzbekiston qonunlariga muvofiqligini aniqlaydi va Oliy sud tashabbusi bilan kelib tushgan normativ-huquqiy hujjatlarning Konstitutsiyaga muvofiqligi toʻgʻrisidagi murojaatlarni koʻrib chiqadi. Oʻz vakolatlari doirasida Konstitutsiya va qonunlarni sharhlaydi.

Konstitutsiyaviy sud tarkibi rais, uning oʻrinbosari va toʻqqiz nafar sudyadan iborat. Sudyalar oʻn yil muddatga saylanadi va har bir sudya alohida tartibda saylanadi. Sud qarorlari va xulosalari rasmiy eʼlon qilingan kundan kuchga kiradi.

Qonun rasmiy eʼlon qilingan kundan eʼtiboran kuchga kiradi. Ayrim normalar (29-modda, 58-modda ikkinchi qismi va 59-modda) 2028-yil 1-yanvardan amalga kiritiladi.