Mirziyoyev Boku sammitida sunʼiy intellektdan masʼuliyatli foydalanishni taklif qildi

Prezident Shavkat Mirziyoyev 15-oktabr kuni Ozarboyjon poytaxti Boku shahrida Osiyoda hamkorlik va ishonch choralari boʻyicha kengashning (OHICHK) yettinchi sammitida ishtirok etdi. 1992-yilda tashkil etilgan platformaga 28 ta aʼzo davlat, 9 ta kuzatuvchi mamlakat va 5 ta xalqaro tashkilot birlashgan.

Mirziyoyev dunyodagi chuqur geosiyosiy oʻzgarishlar yanada yaqin hamkorlik va birgalikda qarorlar qabul qilishni talab etayotganini aytdi. U Osiyoning turli hududlaridagi qurolli nizolardan chuqur xavotirda ekanini bildirib, ularning oqibatlari mintaqa xavfsizligi va global iqtisodiyotga taʼsir qilayotganini taʼkidladi. Har qanday nizo faqat tinch yoʻl bilan, siyosiy-diplomatik vositalar va xalqaro huquqqa tayangan holda hal etilishi kerakligini aytdi. Shuningdek, Osiyoda ishonch infratuzilmasini shakllantirish konsepsiyasini ishlab chiqishni taklif qildi; unda qoʻshma transport va energetika loyihalari, savdo hamda raqamli aloqalar nazarda tutilgan.

Prezident sunʼiy intellekt kundalik hayotni tez oʻzgartirayotganini, imkoniyatlar bilan birga jiddiy xavf-xatarlarni ham keltirib chiqarayotganini taʼkidladi. U raqamli taraqqiyot barchaga foyda keltirishi va texnologik farq qisqarishi uchun imkoniyatlarni safarbar etish zarurligini aytdi.