Oʻzbekistonda 320 mln dollarlik qishloq infratuzilmasi loyihasining ikkinchi bosqichi boshlanmoqda

Toshkentda 2019–2026-yillarda amalga oshirilgan Qishloq infratuzilmasini rivojlantirish loyihasi (RIDP) natijalari yakunlandi va loyihaning davomi boʻlgan RIDP-2 rejalari taqdim etildi. Iqtisodiyot va moliya vazirligi Jahon banki guruhi bilan hamkorlikda 4-noyabrda birinchi bosqich natijalariga bagʻishlangan konferensiya oʻtkazdi.

Birinchi bosqichda besh viloyatning 306 ta mahallasida qariyb 900 ta infratuzilma loyihasi amalga oshirildi. Ular orasida 340 dan ortiq yoʻl, 220 ta elektr taʼminoti va 160 ta suv taʼminoti tizimi, qariyb 100 ta maktab, 40 ta maktabgacha muassasa va 10 ta koʻprik bor. Qariyb 1 mln qishloq aholisi bevosita foyda koʻrdi, ularning deyarli yarmi ayollar edi.

RIDP-2ning umumiy byudjeti 320 mln dollarni tashkil etadi: 150 mln dollarni Jahon banki, 100 mln dollarni Osiyo infratuzilma investitsiyalari banki (AIIB), 70 mln dollarni Oʻzbekiston hukumati ajratadi. Olti viloyatning 296 ta mahallasini qamrab oladigan yangi bosqich 2031-yilga qadar taxminan 1,2 mln qishloq aholisiga, jumladan 600 ming ayol va 300 ming yoshga foyda keltirishi kutilmoqda. Dastur shuningdek tadbirkorlikni qoʻllab-quvvatlab, yangi ish oʻrinlari yaratishga qaratilgan; 15 ta pilot mahallada qishloq xoʻjalik mahsulotlarini qayta ishlash va kichik ishlab chiqarish uchun umumiy foydalanish markazlari tashkil etilishi rejalashtirilgan.