Oʻzbekistonda sogʻliqni saqlashga moliyalashtirish yetti barobar oshdi

Oʻzbekiston Prezidenti Shavkat Mirziyoyev tibbiyot va farmatsevtika xodimlarini kasbiy bayram bilan tabrikladi. 7-noyabrda eʼlon qilingan tabrikda u soʻnggi yillarda sogʻliqni saqlashga moliyalashtirish yetti barobar oshib, 2026-yilda 49 trillion soʻmga yetganini aytdi.

Mirziyoyev DMED axborot tizimi doirasida 38 milliondan ortiq odamning elektron tibbiy kartasi yaratilganini, "Elektron poliklinika", "Elektron kasalxona" va "Elektron retsept" tizimlari ishga tushirilganini bildirdi. Shuningdek, oʻn yil ichida xususiy klinikalar soni 3,5 mingdan 9 mingdan ortiqqa yetgani, mahalliy korxonalarda 6,8 mingdan ortiq dori turi ishlab chiqarilib, 50 dan ortiq davlatga eksport qilinayotgani qayd etildi.

Prezident oʻrtacha umr koʻrish davomiyligi 73,8 yoshdan 75,4 yoshga oshganini, maqsad esa 78 yosh ekanini aytdi. Tibbiyot oliy oʻquv yurtlariga qabul kvotasi 2017-yildan beri 4,5 barobar oshgani, xorijiy talabalar soni 15 mingdan oshgani va 2027-yilda tibbiyot xodimlarini davlat roʻyxatga olish tizimi joriy etilishi rejalashtirilgani taʼkidlandi.