Oʻzbekistonda Konstitutsiyaning 34 yilligi keng miqyosda nishonlanadi

Oʻzbekistonda Konstitutsiya qabul qilinganining 34 yilligi «Konstitutsiya — inson qadri ulugʻlangan erkin hayot va yangi kelajak poydevori!» gʻoyasi asosida nishonlanadi. Prezidentning 2026 yil 6 noyabrdagi farmoyishi bilan Konstitutsiya kunini tayyorlash va yuqori saviyada oʻtkazish boʻyicha keng qamrovli dastur hamda maxsus tashkiliy qoʻmita tasdiqlandi.

Dasturga koʻra, viloyat, shahar va tuman markazlarida koʻchalar, xiyobonlar va jamoat transportida plakatlar, videoroliklar va koʻrgazmali vositalar joylashtiriladi. Davlat organlarida «Konstitutsiya burchaklari» tashkil etiladi. Dekabr oyi davomida olimlar, huquqshunoslar va mutaxassislardan iborat guruhlar mehnat jamoalari, mahallalar, taʼlim muassasalari va harbiy qismlarda uchrashuvlar oʻtkazadi. Toshkent shahridagi Sayilgoh koʻchasida esa Konstitutsiya tarixi aks etgan fotokoʻrgazmalar va huquqiy viktorinalar tashkil etiladi.

Umumiy oʻrta, oʻrta maxsus, kasb-hunar va oliy taʼlim tashkilotlarida «Konstitutsiya darslari», olimpiadalar, rasm va insho tanlovlari oʻtkaziladi. «Constitution.uz» saytidagi elektron kutubxona yangi materiallar bilan boyitiladi, yoshlar uchun interaktiv kitoblar va multfilmlar tayyorlanadi. Bayram arafasida «Zakovat» intellektual oʻyinlari, sport marafonlari, konsert dasturlari va mahalla sayillari rejalashtirilgan.