Özbəkistan Konstitusiyanın 34 illiyini geniş tədbirlərlə qeyd edəcək

Özbəkistanda Konstitusiyanın qəbul edilməsinin 34 illiyi "İnsan ləyaqətinin ucaldıldığı azad həyatın və yeni gələcəyin təməli!" şüarı altında qeyd olunacaq. Prezidentin 2026-cı il 6 noyabr tarixli fərmanı ilə Konstitusiya Günü bayramına hazırlıq və onun yüksək səviyyədə keçirilməsi üçün geniş proqram və xüsusi təşkilat komitəsi təsdiq edilib.

Proqrama əsasən vilayət, şəhər və rayon mərkəzlərində küçələrdə, parklarda və ictimai nəqliyyatda vizual materiallar, plakatlar və videolar yerləşdiriləcək. Dövlət orqanlarında "Konstitusiya guşələri" yaradılacaq. Dekabr ayı ərzində elm adamları, hüquqşünaslar və mütəxəssislərdən ibarət qruplar əmək kollektivləri, məhəllələr, təhsil müəssisələri və hərbi hissələrdə görüşlər keçirəcək. Daşkənddə Səyilgah küçəsində Konstitusiyanın tarixini əks etdirən foto sərgilər və hüquqi viktorinalar təşkil olunacaq.

Məktəblərdə və ali təhsil müəssisələrində "Konstitusiya dərsləri", olimpiadalar, rəsm və inşa müsabiqələri keçiriləcək. Həmçinin constitution.uz saytındakı elektron kitabxana yenilənəcək, gənclər üçün interaktiv kitablar və cizgi filmləri hazırlanacaq. Bayram ərəfəsində zəka oyunları, idman marafonları, konsertlər və məhəllə şənlikləri planlaşdırılır.