Milliy Majlis: Ozarbayjonga qarshi gibrid hujumlar misli koʻrilmagan miqyosda

Ozarbayjon Milliy Majlisining tashqi aralashuvlar va gibrid tahdidlarga qarshi vaqtinchalik komissiyasi mamlakatga qarshi gibrid hujumlar haqida bayonot tarqatdi. Bayonotda mamlakatning Prezident Ilhom Aliyev rahbarligida oʻrta darajali davlatga aylanishi, uning qatʼiy tashqi siyosati, xalqaro nufuzining oshishi, xalqaro energetik xavfsizlikka qoʻshgan hissasi, mintaqaviy tranzit koridorlaridagi strategik ahamiyati hamda ichki siyosiy va iqtisodiy barqarorligi tashqi aktorlarning gibrid hujumlari miqyosini sezilarli darajada oshirgani qayd etilgan.

Bayonotda mintaqadagi davom etayotgan urushlar va keskinlik sharoitida "barqarorlik oroli" deb taʼriflangan Ozarbayjon soʻnggi paytlarda misli koʻrilmagan miqyosda va bir vaqtning oʻzida diniy-mafkuraviy provokatsiyalar, muvofiqlashtirilgan axborot operatsiyalari hamda kiberhujumlarga duch kelgani aytilgan. Komissiya turli erkinliklar niqobi ostida xalqning koʻp asrlik milliy-maʼnaviy va multikultural qadriyatlari hamda diniy eʼtiqodlari nishonga olinayotganini taʼkidlagan.

Bayonotda taʼsir agentlari, yashirin tashkilotlar, xakerlar guruhlari va soxta hisoblar bu faoliyatda ishtirok etgani qayd etilgan. Shuningdek, Ozarbayjonga qarshi chiqayotgan tashqi kuchlar dezinformatsion kontentni mustaqil koʻrinishdagi kanallar orqali raqamli platformalarga joylashtirayotgani va jamiyatda boʻlinish yaratishga urinayotgani taʼkidlangan. Komissiya bu urinishlarga qarshi vakolatli davlat organlari bilan birgalikda kurashilayotganini va hech bir hujum javobsiz qolmasligini bildirgan.