Milli Məclis: Azərbaycana qarşı hibrid hücumlar bənzərsiz miqyasdadır

Azərbaycan Milli Məclisinin xarici müdaxilələrə və hibrid təhdidlərə qarşı müvəqqəti komissiyası ölkəyə qarşı hibrid hücumlarla bağlı bəyanat yayıb. Bəyanatda qeyd olunur ki, ölkənin Prezident İlham Əliyevin rəhbərliyi altında orta səviyyəli dövlətə çevrilməsi, onun qətiyyətli xarici siyasəti, beynəlxalq nüfuzunun artması, beynəlxalq enerji təhlükəsizliyinə töhfəsi, regional tranzit dəhlizlərindəki strateji əhəmiyyəti, habelə daxili siyasi və iqtisadi sabitlik xarici aktorların hibrid hücumlarının miqyasını əhəmiyyətli dərəcədə artırıb.

Bəyanatda bölgədəki davam edən müharibələr və gərginlik fonunda "sabitlik adası" kimi xarakterizə olunan Azərbaycanın son vaxtlar bənzərsiz miqyasda və sinxron şəkildə dini-ideoloji provokasiyalara, koordinasiyalı informasiya əməliyyatlarına və kiberhücumlara məruz qaldığı bildirilir. Komissiya müxtəlif azadlıqlar adı altında xalqın çoxəsrlik milli-mənəvi və multikultural dəyərlərinin və dini inanclarının hədəfə alındığını vurğulayıb.

Bəyanatda təsir agentlərinin, gizli təşkilatların, haker qruplarının və saxta hesabların bu fəaliyyətlərdə iştirak etdiyi qeyd olunur. Həmçinin Azərbaycana qarşı olan xarici qüvvələrin dezinformasiya məzmununu müstəqil görünən kanallar vasitəsilə rəqəmsal platformalara yerləşdirdiyi və cəmiyyətdə parçalanma yaratmağa çalışdığı vurğulanır. Komissiya bu cəhdlərə qarşı səlahiyyətli dövlət orqanları ilə birlikdə mübarizə aparıldığını və heç bir hücumun cavabsız qalmayacağını bildirib.