Rossiyadagi gaz quvuri avariyasi Oʻzbekistonga tranzitga taʼsir qilmadi

Rossiyaning Penza viloyatida magistral gaz quvuri uzilishi Rossiya gazining Qozogʻistonga yetkazib berilishi va Qozogʻiston orqali Oʻzbekistonga tranzitiga taʼsir qilmadi. Bu haqda Qozogʻiston Energetika vazirligi TASS axborot agentligiga maʼlum qildi. Vazirlik maʼlumotiga koʻra, Qozogʻistonga gaz yetkazib berish odatdagi rejimda davom etmoqda, Oʻzbekistonga yoʻnalgan tranzit esa rejalashtirilgan hajmlarda amalga oshirilmoqda. Vazirlik, shuningdek, «Gazprom»dan yetkazib berish rejimini oʻzgartirish boʻyicha soʻrov kelib tushmaganini qayd etdi.

Avariya 13-oktabr kuni Moskva vaqti bilan taxminan soat 11:00 da Belinskiy tumanidagi Volchkovo qishlogʻi yaqinida sodir boʻldi. Mintaqaviy Favqulodda vaziyatlar vazirligi maʼlumotiga koʻra, yuqori bosimli quvur uzilishining sababi texnologik jarayonning buzilishi boʻlgan. Quvur shikastlanganidan keyin balandligi taxminan 70 metr boʻlgan olov ustuni hosil boʻldi, atrofdagi oʻtlar ham yondi. Dastlabki maʼlumotlarga koʻra, halok boʻlgan yoki jarohat olgan kishi yoʻq. Hodisa joyida 34 kishi va 12 texnika ishtirok etdi.