Oʻzbekiston 2030-yilgacha quruq portlar sonini 30 taga yetkazadi

Oʻzbekiston Prezidenti Shavkat Mirziyoyev 2026-yil 12-oktabrda «Transport-logistika tizimini rivojlantirish boʻyicha qoʻshimcha choralar toʻgʻrisida» PP-368-sonli qarorni imzoladi. Hujjatda 2026–2030-yillar uchun soha koʻrsatkichlari belgilandi. Unga koʻra, barcha talablarga javob beradigan xalqaro quruq portlar soni 24 tadan 30 tagacha oshiriladi. Transport-logistika markazlariga soliq va bojxona toʻlovlari boʻyicha imtiyozlar beriladi.

Qarorga muvofiq, 2030-yilga kelib bu markazlarning yillik quvvati kamida 40 mln tonnani tashkil etishi kerak. Transport va logistika xizmatlari eksportini 3,5 mlrd dollarga, Oʻzbekiston hududi orqali tranzit yuk tashishni esa 18,5 mln tonnaga yetkazish rejalashtirilgan. Davlat chegarasi oʻtish punktlarining yuk oʻtkazish qobiliyati va logistika markazlarida konteynerlarga ishlov berish quvvati ikki baravar oshishi kutilmoqda.

Andijon viloyatining Xonobod shahri, Buxoro viloyatining Olot tumani, Surxondaryo viloyatining Termiz tumani hamda Toshkent viloyatining Yangiyoʻl va Ohangaron tumanlari ushbu sohaga ixtisoslashadi. Markazlarda TOS va WMS boshqaruv tizimlari joriy etiladi va 2030-yil oxirigacha Transport vazirligining «E-logistika» platformasiga ulanadi. 2040-yilgacha markazlar yer va mol-mulk soligʻidan toʻliq ozod etiladi.