Toqayev BMT sammitida Kaspiy dengizi Orol fojiasini takrorlashi mumkinligini aytdi

Qozogʻiston prezidenti Qosim-Jomart Toqayev BMT sammitida, agar mintaqa davlatlari uni himoya qilish choralarini koʻrmasa, Kaspiy dengizi Orol dengizi fojiasiga oʻxshash falokatga duch kelishi mumkinligini ogohlantirdi. Akorda xabariga koʻra, u beshta Kaspiy boʻyi davlatini dengiz ekotizimini saqlash uchun kuchlarni birlashtirishga chaqirdi.

Toqayev Orol dengizining qurishi tabiiy resurslardan masʼuliyatsiz foydalanishning halokatli oqibatlarini yaqqol eslatishini aytdi. «Kaspiy dengizi ham xuddi shunday taqdirga duchor boʻlishiga yoʻl qoʻymasligimiz kerak», — dedi u.

Prezident, shuningdek, Kaspiy tyuleni sonining kamayishiga alohida eʼtibor qaratdi. Uning soʻzlariga koʻra, oʻtgan asr davomida bu hayvonlar soni 1 mln dan 270 ming boshga tushib qolgan. Qozogʻistonda Kaspiy tyuleni rasman kam uchraydigan va yoʻqolib ketish xavfi ostidagi turlar roʻyxatiga kiritilgan. Toqayev, shuningdek, Turkmanistondagi birinchi Kaspiy ekologik sammitida mintaqa davlatlarini hamkorlikda harakat qilishga chaqirganini eslatdi.