Qozogʻistonda ishsizlik nafaqasi toʻlash qoidalari oʻzgaradi

Qozogʻistonda 2027-yildan boshlab ishsizlik nafaqasi toʻlanish muddati olti oydan uch oygacha qisqartiriladi. Shu bilan birga, ishsizlar uchun ish qidirish muddati uch kundan 10 kungacha uzaytiriladi. Bu haqda mehnat va aholini ijtimoiy himoya qilish vaziri Asqarbek Ertayev brifingda maʼlum qildi. Xabarni Tengrinews nashri tarqatdi.

Vazirning aytishicha, amaldagi qoidalar koronavirus pandemiyasi davrida joriy etilgan. Pandemiyagacha nafaqa toʻrt oy davomida toʻlanib, ish qidirish uchun uch kun berilgan. Ertayev shunday dedi: “Hozir biz pandemiyagacha boʻlgan darajaga qaytmoqdamiz, lekin endi nafaqa olish davri toʻrt oy emas, uch oy boʻladi. Inson ishni uch kun emas, 10 kun davomida qidiradi.”

Mehnat vazirligi rahbarining soʻzlariga koʻra, oʻzgarishlar ishsizlarning barqaror ishga tezroq qaytishini taʼminlashga qaratilgan. Uning fikricha, uzoq muddat ijtimoiy yordam olish oʻrniga ishga joylashishga yordam birinchi oʻringa chiqishi kerak. Buning uchun qozogʻistonliklarga mos boʻsh ish oʻrinlarini tanlash, bepul oʻqitish va subsidiyalanadigan ish oʻrinlariga joylashtirish taklif etiladi. Oʻzgarishlar kelgusi yildan joriy etiladi.