Qazaxıstanda işsizlik müavinətinin ödənilmə qaydaları dəyişir

Qazaxıstanda 2027-ci ildən etibarən işsizlik müavinətinin ödənilmə müddəti altı aydan üç aya endiriləcək. Eyni zamanda işsizlər üçün iş axtarma müddəti üç gündən 10 günə uzadılacaq. Bunu əmək və əhalinin sosial müdafiəsi naziri Asqarbek Ertayev brifinqdə açıqlayıb. Xəbər Tengrinews tərəfindən yayılıb.

Nazirin sözlərinə görə, mövcud qaydalar koronavirus pandemiyası dövründə tətbiq edilib. Pandemiyadan əvvəl müavinət dörd ay ödənilir, iş axtarmaq üçün isə üç gün verilirdi. Ertayev deyib: “İndi pandemiyadan əvvəlki səviyyəyə qayıdırıq, lakin dörd ay deyil, artıq müavinət alma dövrü üç ay olacaq. İnsan işi üç gün deyil, 10 gün ərzində axtaracaq.”

Əmək Nazirliyinin rəhbərinin dediyinə görə, dəyişikliklər işsizlərin daimi işə daha tez qayıtmasını təmin etməyə yönəlib. Onun sözlərincə, uzun müddət sosial dəstək almaqdansa, işə yerləşməyə kömək prioritet olmalıdır. Bunun üçün Qazaxıstan vətəndaşlarına münasib boş iş yerlərinin seçilməsi, pulsuz təlim və subsidiyalı iş yerlərinə yerləşdirmə təklif olunur. Dəyişikliklər gələn ildən tətbiq olunacaq.