Qirgʻiziston 2–2,5 yil ichida elektr energiyasi importidan voz kechishni rejalashtirmoqda

Qirgʻiziston prezidenti Sadir Japarov mamlakatning 2–2,5 yil ichida elektr energiyasi tanqisligini bartaraf etib, importdan voz kechishni rejalashtirayotganini bildirdi. U bu fikrni Kadamjoy tumani va Qizil-Qiya shahri aholisi bilan uchrashuvda, vaqtinchalik elektr taʼminoti cheklovlarining sabablarini tushuntirar ekan aytdi.

Japarovning soʻzlariga koʻra, Qirgʻiziston 2026-yilda ichki talabni qoplash uchun taxminan 4 milliard kVt·soat elektr energiyasini import qilmoqda. Oʻzbekiston, Qozogʻiston, Turkmaniston va Rossiyada isteʼmol oshgan davrlarda esa Qirgʻizistonga qoʻshimcha yetkazib berish imkoniyatlari cheklanadi. Bunday paytlarda ayrim tumanlarda elektr bir-ikki soatga cheklanadi, qolgan vaqtda esa toʻliq hajmda beriladi.

Economist.kg xabar berishicha, hukumat 2026–2027 isitish mavsumida 19,6 milliard kVt·soat isteʼmol prognoz qilmoqda. Shundan 15,5 milliard kVt·soati ichki ishlab chiqarish, qolgan 4,1 milliard kVt·soati esa import hisobidan qoplanishi rejalashtirilgan. Japarov iyun oyida yangi sanoat korxonalari ishga tushgani sababli isteʼmol oshayotganini, ammo quvvatlar qurilishi talabdan orqada qolayotganini aytgan edi.