Oʻzbekiston elektr energiyasi eksportini Janubiy Osiyo va Afgʻonistonga koʻrib chiqmoqda

16-oktabr kuni Prezident Shavkat Mirziyoyev yoqilgʻi-energetika sohasidagi investorlar bilan ochiq muloqot oʻtkazdi. Prezidentning aytishicha, 2021-yildan beri Oʻzbekistonda elektr tarmoqlarini modernizatsiya qilishga 2 mlrd dollardan ortiq sarmoya kiritilgan. Asosiy ustuvor vazifalar tarmoq infratuzilmasini yangilash va energiyani toʻplash tizimlarini rivojlantirishdir.

Qoʻyilgan rejalarga koʻra, 2030-yilgacha 5 ming km elektr uzatish liniyasi va 16 ta yirik podstansiya qurilishi, shuningdek, akkumulyator quvvatini 4,5 GVtgacha oshirish nazarda tutilgan. Yangi loyihalarning katta qismi Qoraqalpogʻiston, Buxoro, Jizzax, Samarqand, Namangan, Qashqadaryo va Toshkent viloyatlariga toʻgʻri keladi. Ustuvorlik energiya ishlab chiqarish, saqlash va uzatishni oʻz ichiga olgan kompleks loyihalarga beriladi.

Prezident mamlakat ichki bozori bilan cheklanmasligini taʼkidladi. Qozogʻiston va Ozarbayjon bilan birgalikda Kaspiy orqali Yevropaga yashil elektr energiyasi yetkazib berish koridori loyihasi amaliy bosqichga oʻtmoqda. Shuningdek, eksport uchun istiqbolli yoʻnalishlar sifatida Afgʻoniston va Janubiy Osiyo davlatlari koʻrsatildi.