Qishda elektr uzilishlari: Hududiy elektr tarmoqlari rahbari rejali uzilishlar haqida

Oʻzbekistonda elektr isteʼmolchilarining 35 foizi avgust oyida 200 kVt/soatdan ortiq elektr energiyasi sarflagan. Bu haqda 8 oktyabr kuni Hududiy elektr tarmoqlari rahbariyati ishtirokidagi matbuot anjumanida maʼlum qilingan. Gazeta muxbirining xabar berishicha, mamlakatda jami 8 mln 344 ming elektr isteʼmolchisi bor.

Rahbar Sardor Isoqulov xavfi yuqori obyektlar yil boshida aniqlanib, qizil, sariq va yashil toifalarga ajratilishini aytdi. Qizil toifadagi obyektlarda taʼmirlash ishlari avgustgacha, sariq toifadagilarda esa 1 oktyabrgacha yakunlangan. Kunlik elektr isteʼmoli 200 mln kVt/soatga yetgani va kuz-qish mavsumi uchun 843 mlrd soʻm ajratilgani maʼlum qilindi.

Taʼmirlash vaqtida ayrim tarmoqlar vaqtincha oʻchiriladi. Rejali uzilishlar haqida isteʼmolchilarga bir-ikki kun oldin Telegram orqali xabar beriladi, buning uchun raqamlashtirish tizimi ishlab chiqilmoqda. Uzinfocom bilan ishlanmoqda, tizimni joriy etish uchun taxminan ikki-uch oy kerak. Toshkentning Olmazor, Chilonzor va Mirzo Ulugʻbek tumanlarida qisqa muddatli rejali uzilishlar boʻlishi mumkin.