Andijonda sunʼiy intellekt va ilgʻor texnologiyalar kampusining poydevori qoʻyildi

Andijon viloyatining Oltinkoʻl tumanida sunʼiy intellekt va ilgʻor texnologiyalarga ixtisoslashgan yangi texnologik kampusning poydevori qoʻyildi. Ochilish marosimi doirasida kampusning dastlabki taqdimot sinflari jamoatchilikka namoyish etildi, Yevropa universitetlaridan kelgan professorlar esa yangi taʼlim dasturlari boʻyicha ilk maʼruzalarini oʻqidi.

Kampusda robototexnika va mikrochip texnologiyalari, agrotexnologiya va aqlli qishloq xoʻjaligi, biotexnologiya va tibbiy sunʼiy intellekt, fintex va raqamli iqtisodiyot, kiberxavfsizlik, sunʼiy intellekt asosidagi kino sanʼati, immersiv texnologiyalar hamda logistika innovatsiyalari kabi sakkizta ustuvor yoʻnalishda faoliyat olib borish rejalashtirilgan. Loyihadan koʻzlangan asosiy maqsad — Andijonni Markaziy Osiyoning yirik ilmiy-texnologik va innovatsion markazlaridan biriga aylantirish.

Kampusda taʼlim yetti yoshdan boshlanib, maktab, oliy taʼlim, ilmiy tadqiqot va startap bosqichlarigacha uzluksiz davom etadigan yaxlit tizim asosida tashkil etiladi. Loyihaning gʻoyasi, umumiy konsepsiyasi, akademik tuzilmasi va meʼmoriy yechimi professor, doktor N. Selin Shenojak tomonidan ishlab chiqilgan. Yevropaning yetakchi texnika universitetlari bilan uzoq muddatli akademik va ilmiy hamkorlik oʻrnatish rejalashtirilgan.