Qirgʻizistonga soʻnggi 3 yilda 11,8 mlrd dollar investitsiya jalb qilindi

Qirgʻizistonda soʻnggi uch yilda umumiy qiymati 11,8 mlrd dollar boʻlgan 88 ta investitsiya kelishuvi imzolandi. Bu yilning boshidan beri esa 3 mlrd dollarlik 29 ta kelishuv tuzildi. Bu haqda Kabar agentligiga Prezidentga qarashli Milliy investitsiyalar agentligi rahbari Ravshanbek Sabirov maʼlum qildi.

Sabirovning soʻzlariga koʻra, 2025 yilda mamlakat iqtisodiyoti 11% oʻsdi, yalpi ichki mahsulot esa 2 trln somga yetdi. Oʻsha yili toʻgʻridan-toʻgʻri xorijiy investitsiyalar hajmi 27% ga oshib, 1,3 mlrd dollardan oshdi. 2026 yilning birinchi yarmida Qirgʻizistonga 709,9 mln dollarlik toʻgʻridan-toʻgʻri xorijiy investitsiya jalb qilindi, bu oʻtgan yilning shu davriga nisbatan 26,2% koʻp.

Yangi investitsiya loyihalari portfeli 23 mlrd dollarga yetdi. Davlat-xususiy sheriklik doirasida infratuzilma, energetika, ijtimoiy soha va hududlarni rivojlantirish yoʻnalishlarida umumiy qiymati 475 mlrd somdan oshadigan 100 dan ortiq loyiha amalga oshirilmoqda. 2020–2025 yillarda mamlakatga jami 5,9 mlrd dollar toʻgʻridan-toʻgʻri xorijiy investitsiya jalb qilingan; asosiy investorlar orasida Xitoy, Rossiya, MDH davlatlari va Turkiya boʻlgan.