Turkiy davlatlar rahbarlari Yerevanda qoʻshma deklaratsiya qabul qildi

Armaniston poytaxti Yerevanda BMTning Biologik xilma-xillik toʻgʻrisidagi konvensiyasi tomonlarining 17-konferensiyasi (COP17) boshlandi. 16-oktabrda davlat va hukumat boshliqlari ishtirokida “Tabiat uchun liderlar” sammiti oʻtkazildi. Sammitda Qozogʻiston Prezidenti Qosim-Jomart Toqayev, Qirgʻiziston Prezidenti Sodir Japarov va Turkmaniston Prezidenti Serdar Berdimuhamedov ishtirok etdi. Turkiyani qishloq xoʻjaligi va oʻrmonchilik vaziri Ibrohim Yumakli boshchiligidagi delegatsiya vakillik qildi. Ozarbayjon tadbirga delegatsiya yubormadi.

Sammitda bioxilma-xillikni saqlash, suv resurslarini muhofaza qilish va ekologik hamkorlikni kengaytirish masalalari muhokama qilindi. Sammit yakunida “Yerevan deklaratsiyasi – Tabiat uchun harakat” qabul qilindi. Hujjatda 2030-yilgacha bioxilma-xillik yoʻqolishini toʻxtatish va teskari yoʻnalishga burish, 2050-yilgacha esa tabiat bilan uygʻunlikda yashash maqsadlariga sadoqat bildirildi.

Japarov Armanistonga birinchi rasmiy tashrifi chogʻida Goycha va Issiqkoʻl koʻllarini himoya qilish boʻyicha memorandum imzoladi. Toqayev esa xalqaro fond tashkil etishni taklif qildi.