Aholi uchun propan narxini 5000 soʻmgacha oshirish taklif qilinmoqda

Oʻzbekiston Iqtisodiyot va moliya vazirligi aholi uchun suyultirilgan gaz (propan) chakana narxini oshirish va manzilli subsidiyalarni joriy etishni taklif qilmoqda. Qaror loyihasi SOVAZ normativ-huquqiy hujjatlarni muhokama qilish portalida eʼlon qilindi. Hujjat gaz taʼminotiga bozor mexanizmlarini joriy etish, xususiy sektorni jalb qilish va subsidiyalash samaradorligini oshirishni nazarda tutadi.

2026-yil 1-noyabrdan boshlab aholi uchun propanning chakana narxi QQS bilan birga kilogrammiga 5000 soʻm etib belgilanishi rejalashtirilmoqda, bu hozirgi 2000 soʻmdan 2,5 barobar yuqori. Shuningdek, aholiga suyultirilgan gazni yetkazib berishning chegaraviy narxi QQS bilan birga 1300 soʻm etib taklif qilinmoqda. Chegara sentyabrda tashkil etilgan Hududgaztaʼminotʼning qaramogʻidagi LPG-Trade hamda sohadagi xususiy tadbirkorlar uchun amal qiladi.

Subsidiyalar 2030-yil 1-yanvargacha beriladi. Ularga Ijtimoiy reyestrga kiritilgan oilalar; reyestrga kiritilmagan, ammo ehtiyoj mezonlariga javob beradigan va bir aʼzosiga toʻgʻri keladigan daromadi minimal isteʼmol xarajatlarining ikki baravaridan oshmaydigan oilalar (hozir 1,43 mln soʻm, Spot); yetim bolalar va ota-ona gʻamxoʻrligidan mahrum bolalar yashaydigan oilalar kira oladi. Kompensatsiya kilogrammiga 3000 soʻm boʻlib, oyiga 20 kg gacha subsidiyalanadi. Arizalar Milliy ijtimoiy himoya agentligiga topshiriladi; toʻlovlar yoqilgʻi xaridi tasdiqlangandan soʻng ijtimoiy kartaga tushadi. Hisob-kitoblarga koʻra, taxminan 220 ming abonent qamrab olinib, ular uchun 158 mlrd soʻm yoʻnaltiriladi.