Samarqandda AQSh bilan C5+1 biznes dasturi boshlandi

19-oktabr kuni Samarqandda AQSh Davlat kotibi Marko Rubio boshchiligidagi amerikalik delegatsiya tashrifi doirasida C5+1 biznes dasturi Welcome & Orientation kirish sessiyasi bilan boshlandi. Bu haqda Oʻzbekiston Investitsiyalar, sanoat va savdo vazirligi xabar bermoqda.

Tadbirni vazirlik va Amerika-Oʻzbek savdo palatasi birgalikda tashkil etdi. Vazir Laziz Qudratov investitsiya va texnologik hamkorlikning ustuvor yoʻnalishlarini belgiladi hamda vazirlikning qoʻshma tashabbuslarni amalga oshirishga koʻmaklashishga tayyorligini tasdiqladi. Ishtirokchilarga AQSh Savdo vazirligi yordamchisi David Fogel murojaat qildi.

Dasturda 400 dan ortiq kompaniya vakillari ishtirok etmoqda, ulardan 100 dan ortigʻi amerikalik, taxminan 100 tasi Markaziy Osiyoning boshqa davlatlaridan, 200 tasi esa Oʻzbekiston korxonalari. Wabtec, Franklin Templeton, Traxys va Aquatech rahbarlari ham hamkorlik istiqbollarini taqdim etdi. Dastur raqamli texnologiyalar; taʼlim va sogʻliqni saqlash; mineral resurslar; energetika va transport; qishloq xoʻjaligi va toʻqimachilik; moliya va investitsiyalar yoʻnalishlarini oʻz ichiga oladi. Shuningdek, B2B formatida kompaniyalar oʻrtasida hamda B2G formatida biznes bilan davlat tuzilmalari oʻrtasida toʻgʻridan-toʻgʻri muzokaralar rejalashtirilgan.