Energetika vazirligi qishda uzilishlar rejalashtirmaydi, ammo choʻqqi soatlarda cheklovlarga yoʻl qoʻyadi

Qirgʻizistonda yaqinlashayotgan qishda elektr energiyasi tanqisligi sababli uzilishlar jadvali joriy etish rejalashtirilmagan. Biroq elektr energiyasi isteʼmoli choʻqqi paytida energetiklar quvvat yetishmovchiligiga duch kelishi va qoʻshimcha choralar koʻrishi mumkinligi aytilgan. Bu haqda energetika vaziri Altinbek Rysbekov 19-oktyabrda Joʻqorku Kenesh qoʻmitasi majlisida xabar bergan.

Rysbekovning soʻzlariga koʻra, energetika obyektlarini kuzgi-qishki davrga tayyorlash jadval asosida davom etmoqda va ishlarni bajarishda jiddiy muammo yoʻq. Yetishmayotgan elektr energiya hajmini import hisobidan qoplash rejalashtirilgan. 2026-yilda mamlakat chet eldan taxminan 4 mlrd kVt·soat elektr energiyasi sotib olishni koʻzlayotgani aytilgan.

Vazirning taʼkidlashicha, import choʻqqi soatlardagi quvvat tanqisligini hal qilmaydi. Ertalab va kechqurun talab keskin oshishini, yetkazib beruvchi davlatlarda ham yuklama yuqori boʻlishi mumkinligini aytdi. Rysbekov elektr energiyasi va quvvat tanqisligi koʻp yillar davomida shakllanganini hamda uni bitta isitish mavsumida hal etib boʻlmasligini taʼkidladi.