“C5+1” formati: raqamli texnologiyalar sohasida yangi imkoniyatlar

Samarqandda “C5+1” formatidagi tadbirlar Markaziy Osiyo davlatlari va AQSh davlat organlari vakillari hamda yetakchi xalqaro kompaniyalar ishtirokida davom etmoqda. Asosiy tadbirlardan biri raqamli texnologiyalarni rivojlantirishga bagʻishlangan panel sessiya boʻldi. Ishtirokchilar raqamli transformatsiya, sunʼiy intellektni qoʻllash istiqbollari, texnologik infratuzilmaga investitsiya jalb etish hamda Markaziy Osiyo va amerikalik kompaniyalar oʻrtasidagi hamkorlikni kengaytirish masalalarini muhokama qildilar.

Sessiyada Oʻzbekiston Raqamli texnologiyalar vaziri Sherzod Shermatov, AQSh Savdo vazirligining yordamchi kotibi David Vogel, Markaziy Osiyo davlatlari vakillari hamda Google mutaxassislari ishtirok etdi. Shermatov Oʻzbekistonning strategik maqsadi mintaqada va global miqyosda raqamli iqtisodiyotning yetakchi markazlaridan biriga aylanish ekanini taʼkidladi. U Markaziy Osiyo davlatlari oʻrtasidagi hamkorlik mintaqaning xalqaro texnologiya bozoridagi raqobatbardoshligini oshirishini aytdi.

Tadbirda, shuningdek, Oʻzbekistonning axborot texnologiyalari sohasidagi investitsiya imkoniyatlari taqdim etildi. Ishtirokchilarga “IT Park Uzbekistan” va “Enterprise Uzbekistan” xalqaro raqamli texnologiyalar markazi imkoniyatlari haqida maʼlumot berildi. Muhokama qilingan yoʻnalishlar orasida bulut texnologiyalari, sunʼiy intellekt va malakali IT mutaxassislarini tayyorlash bor. Toʻgʻridan-toʻgʻri biznes aloqalarini oʻrnatishga alohida eʼtibor qaratildi.