Farxod Karimov: Markaziy Osiyo xalqaro hamkorlikning muhim ishtirokchisiga aylanmoqda

AQSh Davlat kotibi Marko Rubioning yurtimizga tashrifi va Samarqand shahrida C5+1 formatida tashqi ishlar vazirlari uchrashuvi mintaqaviy diplomatiyadagi muhim voqealardan biri sifatida eʼtirof etilmoqda.

OʻzA muxbiriga fikr bildirgan siyosatshunoslik fanlari doktori, professor Farxod Karimov Markaziy Osiyo jahon siyosati va iqtisodiyotining chekka hududi emas, balki global jarayonlarning faol va mustaqil markazlaridan biriga aylanayotganini taʼkidladi. U 2015-yilda Samarqandda asos solingan C5+1 mexanizmi koʻp tomonlama hamkorlikning muhim platformasiga aylanganini aytib, terrorizmga qarshi kurash, transchegaraviy tahdidlar hamda iqtisodiy va texnologik aloqalarni ustuvor yoʻnalishlar sifatida sanab oʻtdi.

Afgʻonistonga nisbatan Karimov mintaqaning maqsadi bu mamlakatni mintaqaviy iqtisodiy jarayonlarga integratsiya qilish ekanini taʼkidlab, Termiz – Mozori Sharif – Kobul – Peshovar temir yoʻli va CASA-1000 energetika loyihasi muhim ahamiyatga ega ekanini aytdi. U shuningdek, Trans-Kaspiy transport yoʻnalishi (Oʻrta koridor), Orol dengizi fojiasi oqibatlarini yumshatish va transchegaraviy suv resurslaridan oqilona foydalanishni ustuvor yoʻnalishlar sifatida koʻrsatdi.