Sherzod Shermatov: Oʻzbekiston–Xitoy hamkorligi yangi raqamli imkoniyatlar ochmoqda

Raqamli texnologiyalar vaziri Sherzod Shermatov Oʻzbekiston va Xitoy oʻrtasidagi raqamli texnologiyalar, sunʼiy intellekt va innovatsiyalar sohasidagi hamkorlik yangi imkoniyatlar ochayotganini aytdi. Xitoy Xalq Respublikasi Davlat kengashi Bosh vaziri Li Qiang 17–18-oktabr kunlari Oʻzbekistonga rasmiy tashrif bilan bordi. Tashrif doirasida yuqori darajadagi muzokaralar oʻtkazilib, savdo-iqtisodiy, investitsion va madaniy-gumanitar hamkorlikni rivojlantirishga qaratilgan bir qator hujjatlar imzolandi.

Shermatovning aytishicha, Xitoy texnologiyalari arzon, qulay va tez ishlaydigan internet taklif etadi, shu sababli hozir aksar operatorlar ulardan foydalanadi. Hamkorlik doirasida «Huawei IT Academy» va «Seeds for the Future» loyihalari orqali oʻzbekistonlik mutaxassislarga yangi texnologiyalar oʻrgatilmoqda. Oliy taʼlim kurslariga esa hamkor tomonning kurslari joriy etilmoqda. Xitoylik hamkorlar bilan birgalikda «Samarqand-2028» sunʼiy yoʻldoshi kosmosga uchirildi va unga sunʼiy intellektga asoslangan giperspektral tahlil moduli oʻrnatildi.

Shermatov «Huawei»ning mintaqaviy qarorgohi uchun Toshkentni tanlaganini, bu yerdan MDH davlatlari va Mongoliyaga xizmat koʻrsatayotganini aytdi. Kompaniya oʻtgan yili taxminan 12 million dollarlik xizmat eksportini amalga oshirgan. U Li Qiangning tashrifini tarixiy voqea deb atadi va Prezidentning har qanday yirik davlat bilan hamkorlikda iqtisodiyot oʻsishi hamda yuqori daromadli ish oʻrinlari yaratilishiga eʼtibor qaratishini taʼkidladi.