Mirziyoyev: AQSh bilan maʼlumotlar markazlari sohasida katta hamkorlik imkoniyatlari bor

Davlat rahbari Shavkat Mirziyoyev mamlakatning AQSh bilan maʼlumotlar markazlarini yaratish hamda raqamli yechimlarni sanoat, qishloq xoʻjaligi, taʼlim va davlat boshqaruvida joriy etish boʻyicha katta imkoniyatlar koʻrayotganini aytdi. Bu fikrlarni u 19-oktabr kuni Samarqandda Oʻzbekiston-Amerika biznes va investitsiya kengashining ikkinchi majlisi ochilishida bildirdi.

Mirziyoyevning taʼkidlashicha, ikki davlat munosabatlari tarixdagi eng yuqori darajaga yetgan va bunda AQSh Prezidenti Donald Tramp eʼtibori hamda qoʻllab-quvvatlashi muhim rol oʻynagan. Uning soʻzlariga koʻra, ikki tomonlama savdo oʻsmoqda, Oʻzbekistonda AQSh investitsiyali yuzlab kompaniyalar ishlaydi va oʻzbek kompaniyalari AQSh iqtisodiyotiga investitsiya kiritishni boshlagan.

Ustuvor yoʻnalishlar orasida kritik minerallarni qazib olish va chuqur qayta ishlash, energetika tizimini modernizatsiya qilish, qayta tiklanadigan energetika, sunʼiy intellekt va raqamli texnologiyalar koʻrsatildi. Mirziyoyev 45 ta vazirlik va idora ishtirokida tayyorlangan, taxminan 12 milliard dollar qiymatga ega 54 ta kelishuv va tashabbusdan iborat paketni ham eʼlon qildi.