Atabayeva, Aliyeva va Mirziyoyeva Turkman gilami muzeyiga tashrif buyurdi

Gurbanguly Berdimuhamedov nomidagi xayriya jamgʻarmasining tibbiy faoliyat boʻyicha vitse-prezidenti Ogulchahan Atabayeva, Heydar Aliyev jamgʻarmasining vitse-prezidenti Leyla Aliyeva va Oʻzbekiston Prezidenti Maʼmuriyati rahbari Saida Mirziyoyeva seshanba kuni Ashxobaddagi Turkman gilami milliy muzeyiga tashrif buyurdi. Turkmaniston OAVining xabar berishicha, mehmonlarga turkman gilamchiligi tarixi, anʼanalari hamda milliy naqsh va rang xususiyatlari haqida maʼlumot berilgan.

Muzeyda 17–19-asrlarga oid namunalar ham bor, jami taxminan 2 ming noyob va antik qoʻl mehnati gilamlari saqlanadi. Ekspozitsiyada 2001–2003-yillarda toʻqilgan va Guinness rekordlar kitobiga kiritilgan dunyodagi eng katta gilam ham namoyish etilmoqda.

Sayrdan soʻng turkman milliy kiyimlari namoyishi boʻlib oʻtdi. Leyla Aliyeva va Saida Mirziyoyeva 20-oktyabrda Turkmaniston Sanʼat akademiyasida ochilgan “Ona-tabiat” xalqaro sanʼat koʻrgazmasi ochilishi uchun Ashxobodga kelgan edi. Heydar Aliyev jamgʻarmasi hamda Gurbanguly Berdimuhamedov nomidagi xayriya jamgʻarmasi tomonidan tashkil etilgan koʻrgazma 30-noyabrgacha davom etadi. Mehmonlar turkman tomoniga tadbirlarni tashkil etgani va iliq kutib olgani uchun minnatdorchilik bildirdi.