Qoʻshilgan qiymat mamlakat ichida qoladi: iqtisodiyotni rivojlantirishning yangi rejasi

Qirgʻiziston Prezidenti Sadir Japarov "Kelgusi besh yillik uchun strategik vazifalar toʻgʻrisida" respublika yigʻilishida mamlakat iqtisodiy oʻsishini taʼminlashning asosiy yoʻnalishlarini belgiladi. Davlat rahbarining soʻzlariga koʻra, mamlakat iqtisodiy rivoji eksportga yoʻnaltirilgan xizmatlar va yuqori qoʻshilgan qiymatga ega sanoat mahsulotlari ishlab chiqarishga asoslanadi.

Prezident buning uchun savdo va bojxona siyosatini qayta koʻrib chiqish, mahalliy tovar va xizmatlarni tashqi bozorlarga chiqarish hamda eksport imkoniyatlarini kengaytirish zarurligini taʼkidladi. U sanoatni rivojlantirishda texnologiyalarni yangilash, xomashyoni chuqur qayta ishlash, raqobatbardosh mahsulot ishlab chiqarish va korxonalarni xalqaro ishlab chiqarish zanjirlariga ulashga urgʻu berdi.

Shuningdek, asosiy tarmoqlarga investitsiya jalb etish va zamonaviy texnologiyalarni joriy etish orqali yaratilgan qoʻshilgan qiymatning katta qismini mamlakat ichida saqlash maqsadi qoʻyildi. Prezidentning soʻzlariga koʻra, davlat oziq-ovqat, qurilish, farmatsevtika, yengil sanoat, kichik mashinasozlik va foydali qazilmalarni qayta ishlash kabi eksport imkoniyati bor tarmoqlarni qoʻllab-quvvatlaydi.