Қосылған құн елде қалады: Қырғызстанның экономиканы дамытудың жаңа жоспары

Қырғызстан Президенті Садыр Жапаров «Алдағы бес жылға арналған стратегиялық міндеттер туралы» республикалық кеңесте елдің экономикалық өсуін қамтамасыз етудің негізгі бағыттарын белгіледі. Мемлекет басшысының айтуынша, елдің экономикалық дамуы экспортқа бағытталған қызметтерге және қосылған құны жоғары өнеркәсіп өнімін өндіруге негізделеді.

Президент мұның үшін сауда және кеден саясатын қайта қарау, отандық тауарлар мен қызметтерді сыртқы нарыққа шығару және экспорт мүмкіндіктерін кеңейту қажеттігін айтты. Ол өнеркәсіпте технологияларды жаңартуға, шикізатты терең өңдеуге, бәсекеге қабілетті өнім өндіруге және кәсіпорындарды халықаралық өндіріс тізбектеріне қосуға баса назар аударды.

Сондай-ақ негізгі салаларға инвестиция тарту және заманауи технологияларды енгізу арқылы құрылған қосылған құнның басым бөлігін елде қалдыру мақсаты қойылды. Президенттің айтуынша, мемлекет азық-түлік, құрылыс, фармацевтика, жеңіл өнеркәсіп, шағын машина жасау және пайдалы қазбаларды өңдеу сияқты экспорттық әлеуеті бар салаларды қолдайды.