Bekobodda yangi sanoat loyihalariga tamal toshi qoʻyildi

Toshkent viloyatining Bekobod tumanida “Bekobod” sanoat texnoparki hududida metall konstruksiyalar ishlab chiqaradigan zavod qurilishiga tamal toshi qoʻyildi. Tantanali tadbirda Toshkent viloyati hokimi Zoʻyir Mirzayev va Boshqirdiston Respublikasi rahbari Radiy Xabirov ishtirok etdi. Texnopark Oʻzbekiston va Boshqirdiston oʻrtasidagi iqtisodiy hamkorlikning yangi bosqichini boshlab bermoqda.

Zoʻyir Mirzayev soʻnggi yillarda ikki hudud oʻrtasidagi doʻstona aloqalar mustahkamlanib, savdo-iqtisodiy hamkorlik izchil kengayayotganini taʼkidladi. Radiy Xabirov koʻrsatilayotgan doʻstona munosabat va hamkorlik uchun minnatdorchilik bildirib, kelgusida ikki hudud oʻrtasidagi aloqalar yanada kengayishiga ishonch bildirdi.

Umumiy maydoni 100 gektar boʻlgan sanoat texnoparkida 2026–2028-yillarda jami 200 million dollarlik 25 ta investitsiya loyihasini amalga oshirish rejalashtirilgan. Natijada qariyb 2 ming yangi ish oʻrni yaratilishi kutilmoqda. Texnoparkdagi birinchi loyiha “Orstostan Ru” kompaniyasining metall konstruksiyalar zavodi boʻlib, qiymati 20 million dollardan ortiq bu loyiha 8 gektar maydonda quriladi. Zavodning yillik quvvati 25 ming tonna boʻlib, 100 ta yangi ish oʻrni yaratiladi. Toshkent viloyati va Boshqirdiston oʻrtasidagi tovar ayirboshlash hajmi 197 million dollarga yetgan.