Yangi Qarshida xalqaro forumlar uchun kongress-xoll quriladi

Oʻzbekistonning Qarshi shahrida 5 ming 200 gektar hududda yangi shahar barpo etiladi. Tanlangan hudud A-378 «Samarqand – Guzar» avtomobil yoʻli va Shahrisabzga olib boruvchi 4R-79 trassasi oraligʻida joylashgan hamda avval foydalanilmagan choʻl va yaylov yerlaridan iborat. Dastlabki bosh reja 500 ming aholiga moʻljallangan, istiqbolda esa 1 million aholi koʻzda tutilgan.

Yangi shaharda viloyat hokimiyati va boshqa davlat muassasalari joylashtiriladi, shuningdek kongress-xoll, konsert zallari va mehmonxonalar quriladi. Majmua Samarqand va Buxoroda boʻlgani kabi yirik xalqaro forumlar markaziga aylanishi kerak. Prezident aeroport va temir yoʻl vokzalini yangi shahar bilan bogʻlaydigan jamoat elektrotransportini ishga tushirish zarurligini taʼkidladi.

Shuningdek, Qarshi magistral kanali boʻylab turistik majmua loyihasi koʻrib chiqildi. Uch kilometrlik zona uchun 235 gektar yer ajratilgan, loyiha toʻrt bosqichda amalga oshiriladi. Birinchi bosqichda 30 gektar hududda hunarmandlar shaharchasi va turistik zona barpo etiladi. Prezident bosh reja va turistik majmua loyihasini yetakchi xorijiy kompaniyalar ishtirokida ishlab chiqishni topshirdi.