Oʻzbekiston YEII bilan yangi hamkorlik rejasini tayyorlashga kelishdi

Oʻzbekiston Prezidenti Shavkat Mirziyoyev 22-oktabrda Yevroosiyo iqtisodiy komissiyasi Kollegiyasi raisi Baqitjon Sagʻintayevni qabul qildi. Uchrashuvda iqtisodiy hamkorlikni kengaytirish, savdo toʻsiqlarini kamaytirish hamda bojxona va transport protseduralarini soddalashtirish masalalari muhokama qilindi. Yil oxirigacha qoʻshma ishchi guruhning navbatdagi yigʻilishini oʻtkazish rejalashtirilgan.

Tomonlar Oʻzbekiston va Yevroosiyo iqtisodiy ittifoqi (YEII) davlatlari oʻrtasida oʻzaro savdo va investitsiyalarning oʻsganini, logistika aloqalarining mustahkamlanganini qayd etdi. Oʻzbekiston ittifoq faoliyatida kuzatuvchi davlat maqomida ishtirok etadi. Hamkorlik raqamli savdo va yuk tashishni, elektron tijoratni hamda iqlim kun tartibini qamrab oladi. Yevroosiyo iqtisodiy komissiyasi bilan qoʻshma ishchi guruhning toʻrtta yigʻilishi oʻtkazilgan hamda texnik tartibga solish tizimlarini yaqinlashtirish boʻyicha yoʻl xaritasi tasdiqlangan.

Oʻzbekiston, shuningdek, Yevroosiyo taraqqiyot bankining toʻlaqonli aʼzosi boʻldi va bank bilan qoʻshma loyihalar portfeli shakllantirildi. Keyingi vazifalardan biri YEII bilan yangi hamkorlik rejasini tayyorlashdir. Unda savdo toʻsiqlarini kamaytirish, ishlab chiqarish kooperatsiyasini rivojlantirish hamda bojxona va transport protseduralarini raqamlashtirish choralari nazarda tutilishi kerak. Ilgari Mirziyoyev Franklin Templeton rahbari Jenni Jonson bilan fond bozori orqali investitsiya jalb qilish va yirik davlat korxonalarini oʻzgartirish masalasini muhokama qilgan.