Samarqandda 150 oʻrinli “Imkon” reabilitatsiya markazi ochildi

Samarqandda “Bolalar farovonligiga investitsiyalar: kelajak avlodlar uchun barqaror va adolatli taraqqiyot” xalqaro sammiti doirasida 150 oʻrinli “Imkon” reabilitatsiya markazining ochilish marosimi boʻlib oʻtdi. Marosimda Oʻzbekiston birinchi xonimi Ziroat Mirziyoyeva, sammitda ishtirok etayotgan birinchi xonimlar va yuqori martabali mehmonlar qatnashdi.

Prezident huzuridagi Ijtimoiy himoya milliy agentligi tizimiga kiruvchi markazda maktabgacha taʼlim, korreksion-pedagogik yordam va kompleks reabilitatsiya xizmatlari birlashtirilgan. Har bir bola uchun individual dastur ishlab chiqiladi. Markazning maktabgacha taʼlim boʻlimi 150 oʻringa moʻljallangan, 2 dan 7 yoshgacha boʻlgan bolalar uchun 10 ta ixtisoslashtirilgan guruh tashkil etilgan. Ambulator boʻlimda oyiga 100 nafarga yaqin 2 dan 18 yoshgacha boʻlgan bola reabilitatsiya kurslaridan oʻtishi mumkin.

Samarqanddagi muassasa Nukus, Qibray, Qarshi va Zarafshondagi “Imkon” markazlari tarmogʻiga qoʻshildi. Maʼlumotlarga koʻra, 2025-yilda tarmoq muassasalarida 546 mingdan ortiq muolaja va mashgʻulot oʻtkazilgan, 3 777 nafar bola ambulator reabilitatsiyadan oʻtgan. Fargʻonada shunday markaz qurilishi boshlangan, Namangan va Toshkent viloyatining Nurafshon shahrida yangi muassasalar tashkil etish rejalashtirilmoqda.