Oʻzbekistonda uch kunda suyultirilgan gaz bilan bogʻliq 120 dan ortiq qonunbuzarlik aniqlandi

Oʻzbekistonning Davlat xavfsizlik xizmati (DXX) 19–21-oktyabr kunlari oʻtkazilgan suyultirilgan gaz taʼminoti boʻyicha reydlarda 120 dan ortiq qonunbuzarlik holati aniqlanganini maʼlum qildi. Tadbirlar DXX, Ichki ishlar vazirligi, Bosh prokuratura, Favqulodda vaziyatlar vazirligi hamda “Oʻzenergoinspeksiya” xodimlari hamkorligida amalga oshirildi.

39 ta holatda gaz idoralari xodimlarining bevosita aloqadorligi aniqlangan. Reydlar davomida noqonuniy muomalada boʻlgan 3 mingdan ortiq gaz balloni hamda ularda saqlanayotgan 13 636 kilogramm suyultirilgan gaz ashyoviy dalil sifatida olingan. Jizzax viloyatida sotish maqsadida noqonuniy saqlangan 239 ta gaz balloni 9 ta holatda aniqlangan; ulardan 152 tasi Zomin tumanida, ilgari yuqori lavozimlardan birida ishlagan shaxsning qarindoshiga tegishli xonadonda yashirincha saqlangan.

Sirdaryo viloyatining Xovos tumanida 30 ta gaz balloni, Samarqand viloyatining Urgut tumanida esa 2,5 million soʻmga sotilayotgan 3 ta ballon olingan. Past Dargʻom tumanida 22 ta ballon topilgan. Qoraqalpogʻiston Respublikasi, Xorazm, Namangan va boshqa hududlarda ham shunga oʻxshash holatlar aniqlangan. DXX reydlar davom ettirilishini va fuqarolar qonunbuzarliklar haqida 1520 qisqa raqamiga xabar berishi mumkinligini maʼlum qildi.