Qadimiy topilmalardan zamonaviy Ipak yoʻllarigacha

Davlatimiz rahbarining bu yil 21 aprelda qabul qilgan qaroriga koʻra, Samarqand shahrida “Ipak yoʻli” davlat muzeyi tashkil etiladi. Muzey shaharning tarixiy qismida, Koʻksaroy maydoni hududida barpo etilishi rejalashtirilgan va hozirda loyiha ishlari olib borilmoqda.

“Samarqand” davlat muzey-qoʻriqxonasi bosh direktorining ilmiy ishlar boʻyicha oʻrinbosari Safura Roʻzimurodova qaror asosida 2026-2028 yillarga moʻljallangan chora-tadbirlar dasturi tasdiqlanganini aytdi. Dasturda qurilish ishlari, malakali xorijiy va mahalliy mutaxassislarni jalb etgan holda muzeyning ilmiy konsepsiyasi va tematik-ekspozitsion rejasini ishlab chiqish belgilangan. Ekspozitsiyada Buyuk Ipak yoʻli tarixini oʻrganish boʻyicha arxeologik va ilmiy tadqiqotlar, shuningdek Ipak yoʻlida joylashgan qadimiy shaharlar haqidagi ashyolar va maʼlumotlar namoyish etiladi.

Loyihaga koʻra, ekspozitsiya 14 boʻlimdan iborat boʻlib, “Topilmalar zamini”dan boshlanib, “Zamonaviy ipak yoʻllari”gacha davom etadi. Unda zamonaviy axborot texnologiyalari va sunʼiy intellekt imkoniyatlaridan foydalanilib, animatsion va ilmiy hujjatli filmlar yaratiladi. Dastlabki rejalarga koʻra, arxeologiya, tasviriy sanʼat va amaliy sanʼat materiallarini qamrab olgan 6 mingdan ortiq noyob eksponat birlashtiriladi, ularning soni yana oshishi mumkin. Muzeyning tashkil etilishi shaharning sayyohlik jozibadorligini oshirish va tarixiy-madaniy merosini targʻib qilishga xizmat qilishi taʼkidlandi.