Issiqxoʻjaliklariga soliq va subsidiya imtiyozlari beriladi

Oʻzbekiston Respublikasi Prezidentining “Ilgʻor “yashil” texnologiyalar asosida issiqxoʻjaliklarini rivojlantirish va aholi tomorqa yer maydonlaridan samarali foydalanish boʻyicha qoʻshimcha chora-tadbirlar toʻgʻrisida”gi qarori qabul qilindi. Qarorga koʻra, issiqxoʻjaliklariga turli soliq imtiyozlari va subsidiyalar nazarda tutildi.

Qishloq xoʻjaligi tovar ishlab chiqaruvchilari uchun qoʻshilgan qiymat soligʻi va oʻz mahsulotini realizatsiya qilishdan olingan foyda soligʻi stavkasi nol foiz etib belgilandi. Issiqxona faoliyatidan jami daromadining kamida 60 foizini olgan xoʻjaliklar uchun ijtimoiy soliq stavkasi 2026 yil 1 yanvardan 2029 yil 1 yanvargacha 1 foiz etib belgilandi. 2027 yil 1 yanvardan 2030 yil 1 yanvargacha esa yer soligʻi va mol-mulk soligʻi stavkalari 50 foizga kamaytiriladi.

Energiya tejovchi qoplama yoki yashil isitish vositalaridan foydalanayotgan issiqxoʻjaliklariga 2026 yil 1 noyabrdan 2030 yil 1 aprelgacha oktyabr–mart oylarida isteʼmol qilingan elektr energiyasi qiymatining 50 foizi miqdorida subsidiya ajratiladi. Toshkent viloyatining beshta tumanida tomorqa issiqxonalarini isitish uchun xarajatlarning 40 foizi, biroq 100 million soʻmdan oshmagan miqdorda qoplanadi.