Balxash koʻli yaqinida uchta yirik karyer topildi; atrof-muhitga zarar yarim milliardga yaqin

Qozogʻistonning Qaragʻanda viloyati boʻyicha QMA departamenti Balxash koʻli yaqinidagi Sayak qishlogʻi atrofida temir va marganes rudasini noqonuniy qazib olish holatini aniqladi. Agentlikning matbuot xizmati xabar berishicha, ishlarni “Vertex Co.” MChJ va “MiningMetall” MChJ olib borgan. Ularda yer osti boyliklaridan foydalanish huquqi va zarur ruxsatnomalar yoʻq edi.

Yollangan ishchilar hamda ekskavator, yuklagich, maydalagich qurilma va agdargich kabi maxsus texnika ishlatilgan. Ruda maydalanib, keyinchalik tashish va sotish uchun temir yoʻl stansiyasiga olib borilgan.

Tekshiruvda keng koʻlamli qazish izlari boʻlgan uchta karyer aniqlandi. Olib tashlangan tuproqning umumiy hajmi 338 ming kub metr boʻlgan. Mutaxassislarning hisob-kitobiga koʻra, yerni tiklash uchun 485 million tenge kerak. Sud qarori bilan ikki birlik maxsus texnika, avtomobil va tijorat obyektiga taqiq qoʻyilgan. Gumonlanuvchiga nisbatan garov turidagi ehtiyot chorasi tanlangan. Tergov davom etmoqda.

Ilgari Jetisu viloyatida, bojxona hujjatlarida mis rudasi sifatida koʻrsatilgan, qiymati 1,5 milliard tenge boʻlgan 2,6 ming tonna oltin rudasini chetga olib chiqish urinishi toʻxtatilgan edi.